紙媒網上訂閱制？問題是抄報有甚麼內容值得你給錢？

(此乃香港內容，此回將以廣東話分解)

最近 #毒果早抖 轉網上訂閱傳得沸沸揚揚，可能熟悉嘅朋友都比較黑心，或者毒果中人朋友已經所餘無幾，似乎見到都係一地淡友。

而對於所謂紙媒前景，或者抄報未來，其實一直以來已經有定見，已經同不少朋友分享過，只不過未有動力寫低，而且呢次嘅觀點，坦白講好婆媽數，唔係啲o羊高深傳媒理論或者碩士級道理。

而一切睇法嘅緣起，倒唔係網上訂閱，而抄報加到10蚊份。

但報紙10蚊份，對於我呢啲歐陸控而言，其實一啲都唔貴，幾份吹捧開嘅報紙，世界報紙設計大獎級數嘅，如荷蘭人民日報、丹麥政治報都講緊40蚊港紙上下，10蚊其實唔算貴，小報價位。

但點解去到40蚊份有人買，當然呢啲都係相對大報，唔好講文化版一大疊，報紙有設計，而且真係仲有分析評論，自然有市。

至於香港抄報，評論不是無，但多是蛋頭或者左膠友友，甚至有啲時候，免費嘅自由亞洲電台嘅觀點仲豐富過好多垃圾抄抄子？仲要俾錢睇？真係 God help us。

因此抄報加到10蚊份，一個近日同朋友分享嘅笑話係，其中一份世界級嘅倫敦時報，我係長期訂，講緊26鎊一個月，當然係網上版，但老牌大報，起碼關鍵嘢你會知，仲有good English 學。抄報垃圾賣到10蚊，買足30日都貴過訂份 Times 網上版，點解唔直接去吸收人類文明最高成就之一嘅仙氣，好鬼過俾錢買垃圾，養垃圾呢？